Rogaland mållag har fått laga nettressursar som norsklærarar fritt kan bruke i si undervising, og som har ligge ute på våre heimesider. Det nye no er at tekstane frå antologien er innlest og tilgjengeleg på lydfiler. 

Novellene i antologien er innlesne av lærar og suldøl Terje Bråtveit. Med trygg og god rogalandsk røyst losar han oss gjennom tekstane. Det tekniske arbeidet har Hetland media stått for. Dette står dimed både på rogalandsk grunn og er kledd i rogalandsk bunad. Gode nettressursar på nynorsk til bruk i skuleverket er vanskeleg å oppdrive, dette er dimed vår gåve til norsklæraren. Fleire skular i Rogaland har i tillegg fått klassesett av «Vegar ut til alle kantar», og kan no lage undervisingsopplegg med både tekst og lyd. 

Me har i tillegg vore så heldige at me har fått innlesne lydfiler frå lærar Ellen Marie Nordtveit, av novella «Ungdom» av Arne Garborg og «Naken» av Heidi Hjorteland.

Rogaland mållag tykkjer det er ekstra gildt å kunne løfte fram desse gilde tekstane ved hjelp frå vårt ressurssterke skuleverk, ved to gode representantar.